Аввал хабар қилганимиздек, Соғлиқни сақлаш вазирлиги, Санитария-эпидемиологик осойишталик ва жамоат саломатлиги хизмати ҳамда ЮНИСЕФнинг Ўзбекистондаги ваколатхонаси билан ҳамкорликда Ўзбекистонда иммунизация ва вакцинация жараёнлари, Миллий профилактик эмлаш тақвими ва бу борада аҳолига ишончли маълумотларни етказиш юзасидан соҳа экспертлари иштирокида матбуот конференцияси ташкил этилди.
Унда "darakchi.uz" журналистининг "Маймун чечаги юртимизга кириб келса, янги карантин чоралари кўриладими? Яна махсус шифохоналар ажратиладими?", деган саволига Санитария-эпидемиологик осойишталик ва жамоат саломатлиги хизмати бошлиғи ўринбосари, тиббиёт фанлари доктори, профессор Нурмат Атабеков жавоб берди.
"Юртимизга бу касаллик кириб келган тақдирда ҳам бирорта шифохонани мазкур касалликка мослаштириш ёки алоҳида шифохона ташкил этишга эҳтиёж йўқ. Чунки Ўзбекистонда 1980 йилдан аввал туғилганларнинг барчаси касалликка қарши эмланган. Яъни ҳозирда мамлакатимиз аҳолисининг 50 фоизида эмлаш орқали иммунитет пайдо қилинган. Биламизки, бундай ҳолатда касаллик оммавий эпидемия тарзида тарқалиб кетмайди. Шу сабаб биз маймун чечаги сабаб Ўзбекистонда карантин жорий қилиш кўзда тутилмаяпти. Шубҳа остига олинган бемор, лабаратор теширувдан ўтказилади, агар унда касаллик аниқланса, у алоқада бўлган жой, одамлар аниқланиб, профилактика ўтказилади, беморлар кўрсатма асосида даволанади", - деди Атабеков.
