Сенат ялпи мажлисида «Ер участкаларини компенсация эвазига жамоат эҳтиёжлари учун олиб қўйиш тартиб-таомиллари тўғрисида»ги қонун маъқулланди.
Сенат раиси Танзила Норбоева қонун халқимизни қийнаб келаётган айрим муаммоларга барҳам беришини қайд этди. Давлат идоралари томонидан ўзбошимчалик билан ер участкаларини олиб қўйиш, бино ва иншоотларни бузиб ташлаш ҳолатларига чек қўйилади. Асоссиз «снос»ларга барҳам берилади.
Бундан буён ер участкалари жамоат эҳтиёжлари учун олиб қўйилишида мулк ҳуқуқининг устуворлиги, хусусий мулкнинг дахлсизлиги, очиқлик ва шаффофлик таъминланади.
Қонунга мувофиқ, ер участкаларини жамоат эҳтиёжлари учун олиб қўйилиши муносабати билан зарарларни ўрнини қоплаш бўйича республика ва ҳудудий даражада жамғармалар ҳамда компенсация комиссиялари ташкил этилади.
Ер участкасини олиб қўйиш бўйича ташаббус маҳаллий Кенгашларнинг мажлисларида ОАВ ва жамоатчилик вакиллари иштирокида очиқ кўриб чиқилади, натижалари эълон қилинади.
Қонунда ер участкаларининг компенсация эвазига жамоат эҳтиёжлари учун олиб қўйилишига асос бўладиган ҳолатларнинг аниқ рўйхати кўрсатилмоқда. Ер участкаларининг ҳар қандай бошқа мақсадларда олиб қўйилишини жамоат эҳтиёжлари учун олиб қўйиш сифатида талқин этиш қатъиян тақиқланади.
Бузилишга тушган ҳудудда жойлашган ерга бўлган ҳуқуқ мавжуд бўлмай туриб, 15 йил давомида кўчмас мулкка ҳалол, ошкора ва узлуксиз эгалик қилиб келган шахсларга ҳам ушбу кўчмас мулк объекти учун солиқлар тўлаб келингани тасдиқланган тақдирда, мазкур кўчмас мулк объекти қийматининг ўрни қопланади.
Яна бир муҳим жиҳат. Қонунни ишлаб чиқишда миллий анъана ва қадриятларга ҳам алоҳида эътибор қаратилган. Яъни битта маҳалла ёки кўчада яшовчи ҳуқуқ эгалари ва уларнинг оила аъзолари учун қулай шарт-шароитлар яратиш, шунингдек, маданий қадриятларни сақлаб қолиш мақсадида ҳуқуқ эгаларининг хоҳишига кўра, уларга битта маҳалла ёки кўчада жойлашган янги уйлар берилиши белгиланмоқда.
