Жорий йилнинг дастлабки беш ойида Анталияга сайёҳлар оқими 2,4 миллиондан ортиқ кишини ташкил этди.
Ўтган йили Туркиянинг мазкур "сайёҳлик пойтахти"га жами 9 миллионга яқин киши ташриф буюрган. Бу ҳақда мамлакат ахборот агентлиги хабар бермоқда.
Биргина май ойида Туркиянинг туристик пойтахтига 1 миллион 198 минг 110 нафар сайёҳ ташриф буюрган, бу ўтган йилга нисбатан 297 фоизга кўплиги айтилади. Бироқ Россия ва Украина ўртасидаги можаро мамлакат туризмига ҳам таъсир қилгани айтилмоқда.
Маълумот учун, январь-май ойларида Анталияга келган сайёҳлар сони бўйича биринчи ўнталикни Голландия, Польша, Исроил, Қозоғистон, Литва, Эрон ва Дания эгаллайди.
Анталия губернатори Эрсин Язижи интервьюлардан бирида Анталия дунёнинг муҳим туризм марказларидан бири эканлигини билдирган.
Унинг эслатишича, 2020 йилда пандемия фонида Туркия Маданият ва туризм вазирлиги "Хавфсиз туризм" сертификатлаш дастурини жорий қилган ва бунинг натижасида Анталия Ўрта ер денгизи ҳавзасидаги энг кўп сайёҳлар келган шаҳарлар рўйхатида биринчи ўринни эгаллаган.
