Хабарингиз бор, 2023 йилда футбол бўйича Осиё кубоги бўлиб ўтиши белгиланган. Осиё Кубоги-2023 саралаши доирасида 3-турнинг дастлабки баҳсида Фаластин Филиппин дарвозасига жавобсиз 4та тўп киритиб, ўз гуруҳида 1-ўрин билан турнирнинг финал босқичига чиқди. Бу ҳақда Спортни ривожлантириш вазирлиги матбуот хизмати хабар бермоқда.
Маълум қилинишича, гуруҳнинг иккинчи баҳсида Яман Мўғулистон билан ўйнайди. Аммо ушбу гуруҳда 2-ўринни эгаллаган жамоа 4 очкодан кўп жамғара олмайди.
Натижада қолган гуруҳлардаги 6 очко тўплаган жамоалар Ўзбекистон, Иордания, Таиланд, Гонконг, Ҳиндистон, Баҳрайн, Тожикистон ҳамда Қирғизистон 3-тур олдидан муддатидан аввал Осиё кубогига йўлланма олишди.
Ўзбекистон кетма-кет 8-марта Осиё кубогида иштирок этади.
Эслатиб ўтамиз, саралашда 6та гуруҳ бор ва улардаги 1-ўрин соҳиблари ҳамда 2-ўрин эгаларидан энг яхши 5таси финал босқичига чиқади.
Маълумот учун, “C” гуруҳидаги Ўзбекистон саралашнинг сўнгги турида бугун Таиланд билан ўйин ўтказади.
