ФҲДЁ эшигида навбат кутиш ва ортиқча қоғозбозликлар даври тугаяпти. Адлия вазирлиги томонидан ишлаб чиқилган ҳужжат лойиҳаси қабул қилинса, одамларга бир қатор қулайликлар бўлади, дея ёзмоқда вазирлик Ахборот хизмати. Хусусан:
- туғилганлик тиббиёт муассасалари орқали ФҲДЁ бўлимларида қайд этилади. Бунда бола туғилганида туғруқхонада бериладиган тегишли QR-кодли маълумотнома туғилганлик ҳақидаги гербли гувоҳномага тенглаштирилади;
- никоҳ тузиш ва ажратишни қайд этиш учун ФҲДЁ бўлимига ариза бериш эксперимент тариқасида Давлат хизматлари марказлари орқали жорий этилади;
- никоҳдан ўтиш учун ариза берилгани ҳақида яшаш жойидаги маҳалла комитетини хабардор қилиш шарт бўлмайди;
- никоҳдан ажратиш ҳақида ариза берилганда яраштирув комиссияларига электрон тизим орқали хабар юборилади (ҳозир фуқаролар ўзлари боришлари керак);
- фуқароларнинг фамилия, исм ва ота исмини ўзгартиришда текширув ўтказиш учун ички ишлар органига сўровнома юбориш ва хулоса олиш ахборот тизими орқали амалга оширилади.
