Ҳукумат қарори (365-сон, 06.07.2022 й.) билан спорт ҳакамларига малака тоифасини бериш бўйича давлат хизматлари кўрсатишнинг маъмурий регламенти тасдиқланди. Бу ҳақда Адлия вазирлиги хабар берди.
Регламентга кўра, Спорт ҳакамларига қуйидаги малака тоифалари берилади:
- ️халқаро тоифали спорт ҳаками;
- ️миллий тоифали спорт ҳаками;
- ️биринчи тоифали спорт ҳаками;
- ️иккинчи тоифали спорт ҳаками;
- ️учинчи тоифали спорт ҳаками;
- ️спорт бўйича ҳакам.
Давлат хизмати давлат хизматлари маркази ёки ЯИДХП (https://my.gov.uz/uz) орқали Спортни ривожлантириш вазирлиги ва ҳудудий бошқармалар (ваколатли орган) томонидан кўрсатилади.
Аризага шахс фаолият юритаётган ташкилот томонидан берилган малака тоифасини бериш тўғрисидаги тақдимнома илова қилинади.
Давлат хизмати кўрсатганлик учун БҲМнинг 1 баравари (300 минг сўм) миқдорида йиғим ундирилади.
Ваколатли орган ариза келиб тушган куни қарор қабул қилиш учун малака комиссиясига киритади.
Малака комиссияси 1 ойда бир марта чақирилади.
Малака комиссияси ариза берувчи томонидан юборилган ҳужжатларни 3 иш куни ичида кўриб чиқади ва тегишли қарор қабул қилади.
