Айни кунларда Аи-80 русумли автобензин нархи тўсатдан ошиб кетиши жамоатчиликинг кескин эътирозига сабаб бўлиб, кенг муҳокама қилинмоқда.
Хўш, бунга “Ўзбекнефтгаз” қандай муносабат билдиради?
Акциядорлик жамиятининг маълум қилишича, охирги кунларда импорт қилувчи корхоналар томонидан юқори октанли автобензиннинг четдан келтиришини камайиши натижасида, Аи-80 русумли автобензинга бўлган талаб ортмоқда.
“Ўзбекнефтгаз” АЖнинг Тошкент шаҳри ва вилоятига қарашли АЁҚШларда 1 литр Аи-80 русумли автобензин нархи 6 800 сўмни ташкил этган шундай бир пайтда, ҳусусий АЁҚШларда 7 000 сўмдан 7 700 сўмгача ёки 200 сўмдан 900 сўмгача қиммат нархларда сотилмоқда.
"Республика истеъмолчиларига июль ойи 7 кунида етказиб берилган бензин миқдорини ўтган ҳисобот даврига мос равишда таққосланганда, республика бўйича 1 193 тоннага ёки 120 фоизга эҳтиёж ошган бўлса, Андижонда 222 фоиз, Тошкент вилоятида 163 фоиз, Жиззахда 155 фоиз, Қашқадарёда 141 фоизни ташкил этиб республика кўрсатгичидан катта",-дейди жамият.
Таъкидланганидек, Аи-80 русумли автобензинга талаб ортиши натижасида июль ойида Аи-80 русумли автобензиннинг биржа савдоларида 1 тонна учун шаклланган нархи 9 366 минг сўмни ташкил этган.
Жорий ойда ушбу кўрсаткич 10 454 минг сўмни ташкил этиб, июнь ойида ўртача шаклланган нархларга нисбатан 974 минг сўмга ошган. Бу эса ўз навбатида, хусусий АЁҚШлар томонидан сотиладиган Аи-80 русумли автобензин нархи ошишига олиб келгани айтилади.
