Мудофаа вазирлиги Нукусдаги намойишлар пайтида аскарларнинг хизмат жараёни ёритилган видеони эълон қилди.
"Қурол ишлатиш мумкинмаслиги ҳақида буйруқ олган эдик. Чунки у ерда оддий, содда халқ бор эди",-дейди видео давомида ҳарбий.
Маълум қилинишича, махсус ҳаракат кучлари оломонни тинчитиш учун БТР техникасида доимий жойлашув жойига яқинлашиб қолганда одамлар қўлида турли темир жисмлар, арматуралар, лом, ёнувчи аралашмалар борлиги аён бўлган.
"Ортимиздан 100-200 оломон ёпирилиб келаётганди. Ҳамма нарсага тайёр туринглар деган "команда" бердим. Шу пайтда ҳарбий қисмга алоқага чиқиб, ёрдамчи куч кераклигини айтдим. Ойналарни синдиришни, техникамизга зарба беришни бошлашди. Асосий мақсадимиз қорақалпоқ халқининг тинчлигини таъминлаш бўлгани учун бу вазиятда техникамизни халқ устига бостириб ҳайдамадик, қурол ишлатмадик. Ҳаммасига чидаб, қасамёдга содиқлигимизни йигитлар билан исботладик",-дейди капитан.
Маълумот учун, Қорақалпоғистонда тартибсизликлар бошланган бир вақтда мудофаа вазири ҳудудга бориб, ҳарбийлар тайёргарлигини кўздан кечирган.
Дилбар Абдунабиева
