Бугун, 14 июль куни Silk Way West Airlines хусусий юк ташувчи авиакомпанияси Боку – Навоий – Гонконг йўналиши бўйича илк чартер-юк рейсини амалга оширди. Бу ҳақда Uzbekistan Airpots хабар бермоқда.
Маълум қилинишича, Boeing 747-800 маҳаллий вақт билан 12:48 да Навоий халқаро аеропортига келиб қўнди ва бир неча соатдан кейин Гонконгга жўнаб кетди. Анъанага кўра, самолёт сув аркаси билан кутиб олинди.
Silk Way Airlines Озарбайжоннинг хусусий юк ташувчи авиакомпанияси бўлиб, бош офиси ва парвозларини Боку шаҳридаги Ҳайдар Алиев халқаро аэропортида амалга оширади. У Европа ва Осиё, Америка Қўшма Штатлари ва Африкани боғлайдиган юк ташиш хизматларини, шунингдек, давлат ва нодавлат ташкилотлари учун хизматларни тақдим этади.
Эслатиб ўтамиз, жорий йилнинг июн ойида Хитойдан Ўзбекистон орқали Европага ва қарама-қарши йўналишдаги рейсларни амалга оширувчи SkyTaxi юк авиакомпанияси Тошкентга парвозларни бошлаган эди.
