Коррупцияга қарши курашиш агентлиги хабарига кўра, улар қарийб 800 млн. сўм ва 6 минг АҚШ доллар миқдоридаги бюджет маблағларини талон-тарож қилган.
Маълум қилинишича, ноқонуний жараён расмий ҳужжатларга сохта ёзувлар қўшиш орқали содир этилган.
Федерация президенти Н.Н. айрим ҳолатлардан норози бўлиб, ташкилот собиқ раҳбарлари юзасидан агентликка мурожаат йўллаган. Коррупцияга қарши курашиш агентлиги томонидан федерация фаолияти билан боғлиқ коррупцион ҳолатлар ўрганиб чиқилиб, унинг якунлари Бош прокуратурага тақдим этилган.
Тегишли мутасаддилар билан ўтказилган тадбирларда юқоридаги ҳаракатлар аён бўлган.
Хусусан, 2020-2021 йилларда ўтказилган 10 та ўқув йиғинларида 49 нафар спортчи амалда қатнашмаган ҳамда меҳмонхона хизматидан фойдаланмаган бўлса-да, иштирок этганлиги ҳақида сохта ҳужжатлар расмийлаштирилиб, 403 млн. сўмлик бюджет маблағлари ўзлаштириб юборилган.
Спортчилар томонидан ишлатилмаган 64 турдаги 78,5 млн. сўмлик дори воситалари ҳам талон-торож қилинган. Шунингдек, спорт зал ижарага олинганлиги тўғрисида ҳужжатлар расмийлаштирилиб, 128 млн. сўм маблағлар амалда спорт залига эга бўлмаган меҳмонхонага ўтказилиб, ўзлаштирилган.
Шу каби 2021 йилда ўтказилган 3 та спорт мусобақалари қатнашувчилари томонидан тўланган 150 млн. сўм бадал пуллари кирим қилинмаган.
Бундан ташқари, меъёрий ҳужжатлар талабаларига зид равишда карате бўйича жаҳон чемпиони Д.О.га тренерлик қилмаган У. Б.га давлат бюджетидан асоссиз равишда 6 минг АҚШ доллари тўланишига эришилиб, маблағлар ўзлаштирилган.
Дилбар Абдунабиева.
