Ганада геморрагик иситмани келтириб чиқарадиган, кам учрайдиган Марбург вирусини юқтиришнинг иккита ҳолати аниқланди. Бу ҳақда «РИА Новости» хабар бермоқда.
Мазкур маълумотни Африка мамлакати соғлиқни сақлаш хизмати тасдиқлаган. Жаҳон соғлиқни сақлаш ташкилоти ҳам (ЖССТ) Ганада Марбург инфекциясига шубҳа қилинган иккита ҳолатни эълон қилган. Давлат вакилларининг айтишича, тест натижаларидан сўнг улар тасдиқланган. Ҳозирда 2 нафар бемор ва улар билан алоқада бўлган 98 киши карантинда сақланмоқда.
Маълумот учун:
Марбург геморрагик иситмаси номи билан танилган Марбург вируси кўпинча ўлимга олиб келадиган оғир ҳасталик ҳисобаланди. У беморларда кучли геморрагик иситмани келтириб чиқаради. Касалликнинг ўртача ўлим даражаси тахминан 50 фозини ташкил қилади.
Марбург вируси одамларга кўршапалаклардан юқади ва инфекцияланган шахсларнинг сўлаги, юзалар ва материаллар билан бевосита алоқа қилиш орқали одамлар орасида тарқалади. ЖССТ ҳозирда иситмани даволаш учун рўйхатга олинган вакциналар ёки вирусга қарши дорилар мавжуд эмаслигини таъкидлаган. Беморнинг омон қолиш даражасини ошириш учун симптоматик даволаш усули қўлланилади.
