Волейбол федерацияси мансабдор шахслари ва бошқалар бюджет маблағларини жуда кўп миқдорда талон-торож қилгани аниқланди. Бу ҳақда Бош прокуратура ахборот хизмати хабар берди.
Маълум бўлишича, Бош прокуратура томонидан мутасадди идоралар билан биргаликда Ўзбекистон Волейбол федерациясида бюджетдан ажратилган маблағларнинг мақсадли ишлатилиши ўрганилган. Ўрганишда, Федерация мансабдор шахслари ва бошқалар бюджет маблағларини жуда кўп миқдорда талон-торож қилишгани аниқланган.
Хусусан, собиқ Жисмоний тарбия ва спорт вазирининг буйруғига асосан, Федерацияга 54 нафар спортчилар билан 23 кунлик ўқув-машғулот йиғини ўтказиш учун бюджетдан 445 миллион сўм ажратилган, лекин амалда 10 кун ўқув-машғулот йиғини ўтказилиб, 231 миллион сўм бюджет маблағлари ўзлаштирилган. Бундан ташқари, терма жамоа ва унинг захираси таркибига киритилмаган 29 нафар спортчини турли спорт йиғинларига юборилиб, 75 миллион сўм маблағлар асоссиз сарфланган.
Таъкидланишича, терговга қадар текширув давомида бюджетга етказилган зарарнинг 120 миллион сўми қопланиши таъминланган. Мазкур ҳолатлар бўйича жиноят иши қўзғатилиб, дастлабки тергов ҳаракатлари бошланган.
