Хабарингиз бор, Ўзбекистонда 18 июлдан “UzAuto Motors” АЖ Асака шаҳридаги заводида Chevrolet Tracker-2023 автомобилини ишлаб чиқариш бошланди.
Куни кеча компания ўзининг 26 йиллигига совға сифатида автомашина тақдимотини ўтказди.
Маросимда “Ўзавтосаноат” АЖ бошқарув раиси Шавкат Умурзаков сўзга чиқиб, бутун саноат ходимларини янги модел ишлаб чиқарилишининг бошланганлиги билан табриклаган.
“Бугун биз барчамиз тарихий ва унутилмас воқеанинг гувоҳи бўлдик – “UzAuto Motors” компанияси Chevrolet Tracker замонавий автомобилини тўлиқ силкда ишлаб чиқарувчилардан бирига айланди. Бу фақат бошланиши. Компания бундан буён автомобиллар қаторини замонавий ва талабгир автомобиллар билан тўлдиради. Буларнинг барчаси мамлакатимиз раҳбарияти ва General Motors компаниясининг ҳар томонлама кўмаги ҳамда бутун саноат ходимларининг, жумладан, “Ўзавтосаноат”, “UzAuto Motors” АЖ, маҳаллийлаштириш корхоналари ва ишлаб чиқаришни йўлга қўйишда иштирок этаётган бошқа кўплаб таркибий корхона ходимларининг қўллаб қувватлаши туфайли амалга оширилди”, – дея таъкидлайди Умурзаков.
Янги "Chevrolet Tracker-2023" автомобилининг сотувга чиқарилиши ҳайдовчилар учун ўзига хос совға бўлди. Хўш, кўпчилик орзиқиб кутган мазкур автомобиль қандай қулайлликка эга бўлади?
Chevrolet Tracker-2023
Chevrolet Tracker ихчам кроссовери истеъмолчи талабларининг энг муҳим сифатларни: замонавий дизайн, хавфсизлик, қулайлик, самарадорлик ва тежамкорликни ўзида мужассам этган.
Chevrolet Tracker-2023 спорт кроссовери ўзининг замонавий ташқи кўриниши ҳамда ички салон интерери билан, GM томонидан ишлаб чиқарилган CSS Prime тежамкор двигатели, шунингдек, интеллектуал функциялар ёрдамида уланиш ва хавфсизлиги билан ажралиб туради.
Эслатиб ўтамиз, йил охиригача компания кўпчилик кутаётган "Chevrolet Onix" автомобилини ишлаб чиқаришни йўлга қўйишни режалаштирган.
