Иккинчи жаҳон уруши даврида Белоруссия ҳудудида жанг қилиб, номи тилларда достон бўлган қаҳрамон Мамадали Топиболдиев ҳақида Ўзбекистон кинематография агентлиги ва Белорусфильм миллий киностудияси билан ҳамкорликда янги бадиий фильм суратга олинади.
Казбек фронтда кўплаб мардлик намуналарини кўрсатган уруш қаҳрамонларидан бири ҳисобланади. Эътиборли жиҳати, 1940 йилда у ўта муҳим ишлар топшириғини бажараётган немис жосусини тириклайин қўлга олган. Мазкур қаҳрамонлиги учун Казбек юксак орден билан мукофотланган. Бугунги кунда Белоруссиянинг Минск шаҳридаги музейда унинг номи шараф билан эътироф этилган.
Казбек ҳар бир амалга оширган операциясидан сўнг дарахт ёки деворга «Казбек» деб ханжарда ўйиб ўз исмини ёзиб чиққан. Бу душманга доим қўрқув солиб келган. Боши учун Гитлер 50 минг марка мукофот ваъда қилган фарғоналик Казбек образини Улуғбек Қодиров ўйнаши режалаштирилган. Бу ҳақда Белорусфильм миллий киностудиясида ташкил этилган матбуот анжуманида айтиб ўтилди.
Фильмни кўплаб муваффақиятли бадиий фильмлар ярата олган Владимир Климов тасвирга олиши кўзда тутилган. Унда Ўзбекистон, Белоруссия, Германия, Грузия ва бошқа хорижлик актёрлар ўйнаши режалаштирилган. Сентябрь ойида пойтахтимизда бўлиб ўтадиган "Ипак йўли-XIV" Халқаро кинофестивалда мазкур фильмнинг тақдимоти ҳам бўлиб ўтиши кутилмоқда.
