ИИВ Ғиждувон туманида юз берган ҳолат юзасидан маълумот берди.
Қайд этилишича, туманда яшовчи А.Р. маҳалладоши, кабутар боқувчи фуқаро Ф.Б. га уйида кабутар сақлашга қизиқиши ортаётганини айтиб, ундан 13 дона кабутар келтириб беришини сўраган. Кўп ўтмай олиб келинган кабутарларнинг икки донаси йўқолиб қолган. Фуқаро қўшнисидан йўқолган кабутарларни топиб беришини талаб қилган. Шунда қўшниси кабутар учиб кетган бўлиши мумкинлигини, эвазига бир дона ўзининг кабутарини беришини ва иккинчи кабутар учиб қайтиб келмаса, кейинроқ яна бир дона кабутар беришини тушунтирган.
Бироқ жаҳли чиққан шахс ўзига аввалдан таниш бўлган, уйида бензин сотувчи танишининг олдига бориб, у билан спиртли ичимлик ичган. Кечки пайт уйига қайтгунча танишидан бензин олиб, кабутар сотувчи қўшнисининг ҳовлиси олдида турган машинага бензин сепиб, ёқиб юборган ва воқеа жойидан қочиб кетган.
Дастлабки, тергов-суриштирув ишлари давомида жабрланувчига 86 млн 397 минг 465 сўмлик моддий зарар етказилгани аниқланиб, тегишли тартибда жарима белгиланган.
Унга нисбатан Ўзбекистон Республикаси Жиноят кодексининг 173-моддаси 2-қисми қўлланилиб, 2 йил 6 ой муддатга озодликдан маҳрум қилиш жазоси тайинланган.
