Соғлиқни сақлаш мутахассислари Қўшма Штатларда маймун чечаги эпидемиясини тўхтатиш учун вақт тугаб бораётганидан огоҳлантирмоқда, дея ёзмоқда Zamon.uz.
Қайд этилишича, мамлакатда касалликнинг 3000 га яқин ҳолати тасдиқланган.
АҚШ Касалликларни назорат қилиш ва олдини олиш марказларининг сўнгги маълумотларига кўра, Нью-Йорк штатида энг кўп (900) ҳолат аниқланган. Шунингдек, Калифорния (356) ва Флоридада (247) ҳам вазият жиддий.
Мичиган университетининг юқумли касалликлар бўйича мутахассиси Прити Малани соғлиқни сақлаш кўплаб соҳаларда, шу жумладан, тезкор синовдан ўтказиш ва унга муҳтож бўлган беморлар учун даволаниш имконияти бўйича жуда орқада қолаётганини айтиб ўтган.
АҚШ расмийлари аллақачон синовларни кенгайтириб, минглаб вакциналарни тақдим этишган, бироқ чекланган таклиф талабга мос эмас. Шу боис ҳам мутахассислар федерал маъмуриятни касаллик авж олишига йўл қўймаслик учун кенгроқ чоралар кўришга чақирди.
