Республикамиз божхоначилари тилла ва заргарлик буюмларининг божхона чегаралари орқали ноқонуний равишда олиб ўтилишига доир навбатдаги ҳолатга чек қўйишди. Бу ҳақда "darakchi.uz"га Давлат божхона қўмитаси матбуот хизмати хабар қилди.
Давлат божхона қўмитасининг “Тошкент-АЭРО” ихтисослаштирилган божхона комплекси ходимлари ҳаво йўллари орқали тилла ва заргарлик буюмларининг ноқонуний олиб ўтилишининг олдини олишга қаратилган тезкор чора-тадбирларни мунтазам давом эттиришмоқда.
Жумладан, “Тошкент” халқаро аэропорти”да “Истанбул-Тошкент” рейси бўйича парвозини якунлаган йўловчилардан бири божхонадан яшил йўлак орқали ҳаракатланар экан, унинг безовталаниши божхона ходимларининг диққатини тортди.
Шундан сўнг, унга тегишли қўл юклари кўздан кечирилганда, унинг сумкаси ичида йўловчи божхона декларацияси ва божхона ходимларининг оғзаки сўровида маълум қилинмаган заргарлик буюмлари яширилгани фош бўлди.
Фақатгина шу эмас. Қаранг-ки, йўловчи боласини ўтқазган коляска чўнтагига ҳам тилла тақинчоқларни яширган экан. Шундай қилиб, ушбу шахс божхона назоратига тақдим қилмасдан туриб, жами оғирлиги 1 кг. 198 гр.ни ташкил қилувчи тилладан ишланган заргарлик буюмларини олиб киришга уринган вақтда тўхтатиб қолинди.
Мазкур заргарлик буюмларининг умумий қиймати эса салкам 590 млн. сўмни ташкил қилмоқда.
Таъкидлаш жоизки, республикамиз божхоначилари томонидан жорий йилнинг ўтган 7 ойи давомида аниқланган 177 та божхона қонунбузилиши ҳолатларида қиймати 24 млрд. 663 млн. сўмлик, салкам 16 кг. оғирликдаги тилла ва заргарлик буюмларининг ноқонуний олиб ўтилишига чек қўйилган. Тўхтатиб қолинган заргарлик буюмларининг миқдори эса ўтган йилнинг шу даврига нисбатан 40 фоизга ошган.
Эслатиб ўтамиз, айрим турдаги товарларни божсиз олиб киришнинг чекланган меъёрларига кўра, жисмоний шахслар республикамизга қимматбаҳо металл ва қимматбаҳо тошлардан ясалган заргарлик буюмларидан – 65 гр.гача олиб киришлари мумкин.
Ҳозирда юқоридаги ҳолат юзасидан божхона органлари томонидан терговга қадар текширув ҳаракатлари олиб борилмоқда.
