Мирзиёев Арабистоннинг етакчи компаниялари ва молиявий тузилмалари раҳбарлари билан учрашди

СИЁСАТ 18.08.2022, 20:12
Мирзиёев Арабистоннинг етакчи компаниялари ва молиявий тузилмалари раҳбарлари билан учрашди

Хабарингиз бор, айни вақтда Ўзбекистон раҳбари давлат ташрифи билан Саудия Арабистонида бўлиб турибди.

Хусусан, мамлакат етакчисининг ташриф давомидаги илк манзили муқаддас Мадина шаҳри бўлганди.

Шунингдек, у сал аввал Шавкат Мирзиёев Ислом ҳамкорлик ташкилоти бош котиби Ҳусайн Иброҳим Тоҳа билан учрашгани хабар қилинганди.

Айни дамда давлат раҳбари матбуот хизматининг маълум қилишича, Мирзиёев Жидда шаҳрида Саудия Арабистони Подшоҳлигининг етакчи компаниялари ва молиявий тузилмалари раҳбарлари билан учрашув ўтказди. 

Таъкидланишича, иштирокчиларнинг эътибори ташриф арафасида ўтган Ўзбекистон-Саудия ишбилармонлар кенгаши йиғилишининг мисли кўрилмаган натижаларига қаратилган. Жумладан, унинг якунида умумий қиймати 14 миллиард доллардан зиёд лойиҳаларни амалга ошириш тўғрисида битимлар имзоланган.

Давлат раҳбари Саудия компанияларини янги лойиҳаларни ишлаб чиқиш ва амалга оширишда янада яқиндан ҳамкорлик қилишга чақирган.

Ўзбекистон шамол электр станцияларини барпо этиш, “яшил” водород ишлаб чиқариш, муқобил энергетикани ривожлантириш, саноатда рақамлаштиришни чуқурлаштириш ва қўшма илмий тадқиқотлар билан шуғулланиш борасида фаол ҳамкорликка тайёр экани таъкидланган.

"Ҳамкорлик қилиш таклифига жавоб берар экан, Саудия Арабистони компания, холдинг ва корпорациялари раҳбарлари Ўзбекистонда фаол бизнес учун яратилган шароитларни юксак баҳоладилар. Ўз чиқишларида улар қўшма лойиҳаларни амалга ошириш режаларини баён қилиб, турли хил йўналишларда ўзаро алоқалар ва шерикликни ривожлантиришга доир нуқтаи назари билан бўлишдилар",-дейилади хабарда.

Президент Шавкат Мирзиёев саудиялик ҳамкорларнинг таклиф ва фикр-мулоҳазаларини диққат билан тинглаб, барча лойиҳаларнинг амалга оширилиши устидан қатъий назорат ўрнатилишини қайд этган.

Шарҳлар

Об-ҳаво: Тошкент
Валюта курси
1