2022 йил 23 август куни телеграм каналларида расмий статистика маълумотларига таянган ҳолда январ-июль ойларида электр энергиясини ишлаб чиқариш кўрсаткичлари қисқарганлиги маълум қилинди. Унда Давлат статистика қўмитасидан олинган маълумотда 2022 йил январ-июль ойларида 40 млрд 43 млн кВт.соат электр энергияси ишлаб чиқарилиб, ўтган йилнинг шу даврига нисбатан 297 млн кВт.соат кам эканлиги қайд этилган.
Мазкур хабарларга Энергетика вазирлиги раддия берди.
Аниқ ҳисоботларга таяниб, вазирликнинг маълум қилишича, жорий йилнинг январ-июль ойларида республика бўйича 43 млрд 250 млн кВт.соат ёки ўтган йилнинг мос даврига нисбатан 2 млрд 177 млн кВт.соат кўп (ўсиш суръати 105,3%) электр энергияси ишлаб чиқарилган.
- Иссиқлик электр стансиялари ва марказларида 38 млрд 551 млн кВт.соат (ўтган йилга нисбатан 1 млрд 18 млн кВт.соат кўп, ўсиш суръати 102,7%) электр энергияси ишлаб чиқарилган. Шу жумладан “Иссиқлик электр стансиялари” АЖда 33 млрд 77 млн кВт.соат, Ангрен ИЕС ва Янги-Ангрен ИЕС томонидан 3 млрд 345 млн кВт.соат.
- ДХШ асосидаги янги ИЕСларда 2 млрд 128 млн кВт.соат.
- ДХШ асосидаги қуёш фотоелекр стансиялар томонидан 219 млн кВт.соат.
- Гидроелектр стансияларда томонидан эса 4 млрд 84 млн кВт. соат (898 млн кВт.соат кўп, 128%).
Электр стансияларида амалда ишлаб чиқарилган ҳамда Давлат статистика қўмитаси маълумоти асосида “бакироо” телеграм каналида берилган электр энергияси миқдорлари орасида юзага келган фарқ қуйидаги сабаблар билан изоҳланади:
Биринчидан, Давлат статистика қўмитаси маълумотида кичик корхоналар тоифасига киритилган электр энергияси ишлаб чиқарувчилар инобатга олинмаган. Хусусан, ДХШ асосида Туркия компаниялари билан ҳамкорликда Бухоро, Тошкент ва Хоразм вилоятларидаги ишга туширилган 5 та янги иссиқлик электр стансиялари, шунингдек Навоий ва Самарқанд вилоятларида ишга туширилган 2 та қуёш фотоелектр стансиялари ҳамда Оҳангарон, Ҳисорак, Қамчиқ гидроелектр стансияларида ишлаб чиқарилган электр энергияси ҳисобга олинмаган. Ушбу стансиялар томонидан жорий йилнинг январ-июл ойларида ишлаб чиқарилган электр энергияси 2 млрд 515 млн кВт.соатни ташкил этган.
Иккинчидан, Тошкент вилоятининг Қибрай туманида “Акса Энержи”, компанияси томонидан ишга туширилган ИЕС орқали ишлаб чиқарилган 1 млрд 78 млн кВт.соат электр энергиясини ишлаб чиқариш сифатида эмас, балки электр энергиясини сотиш сифатида киритган;
Учинчидан, баъзи электр энергияси ишлаб чиқарувчи корхоналар томонидан ҳар ой якунида Давлат статистика қўмитасига “тармоққа берилган” электр энергияси бўйича рақамлар берилади. Шу билан бирга, улар томонидан “Ўзбекистон миллий электр тармоқлари” АЖга “умумий ишлаб чиқариш” бўйича рақамлар тақдим этилади. Шу ва бошқа сабабларга кўра рақамлар орасида яна 802 млн кВт.соат фарқ юзага келган ва бу кўрсаткич статистика маълумотларида акс этмаган, дейилади расмий муносабатда.
