“UzAuto Motors” АЖ замонавий дизайн, хавфсизлик, қулайлик, самарадорлик ва тежамкорликни ўзида мужассам этган ихчам кроссовер Chevrolet Tracker автомобилини етказиб беришни бошлади. Бу ҳақда “UzAuto Motors” матбуот хизмати хабар бермоқда.
2022 йил 5 сентябрь куни энг илғор хавфсизлик технологиялари билан жиҳозланган Chevrolet Tracker моделининг эгаларига автомобилнинг калитлари топширилди.
Эслатиб ўтамиз, 30 август куни Chevrolet Tracker автомобилини сотиб олиш учун шартнома тузиш бошланганди.
Эътиборлиси, автомобилларга шартнома тузиш бошланган биринчи куннинг ўзидаёқ, автосалонларда бир неча соат ичида янги моделни харид қилиш истагини билдирган харидорлар томонидан 1.5 мингдан ортиқ автомобиль учун шартнома имзоланган. Сотув бошланган биринчи куннинг ўзида жами 7 471 дона автомобиль учун шартнома тузилганди.
Ўзгача дизайн ва замонавий опсиялар ҳамда юқори хавфсизлик технологияларига эга бўлган ушбу автомобиль модели юртимиз автомобилсозлик саноати ривожланишида олдинга ташланган яна бир улкан муваффақиятли қадам бўлди.
