Туркия президенти Ражаб Тоййиб Эрдўғон Россия президенти Владимир Путин билан учрашувда унга яна бир бор президент Владимир Зеленский билан музокара ўтказишни таклиф қилади. Бу ҳақда CNN Turk телеканали хабар бермоқда.
Таъкидланишича, Эрдўғон ва Путин Ўзбекистоннинг Самарқанд шаҳрида учрашади.
Аввал хабар берганимиздек, 15-16 сентябрь кунлари Самарқанд шаҳрида Ўзбекистон Республикаси Президенти Шавкат Мирзиёев раислигида Шанхай ҳамкорлик ташкилоти Давлат раҳбарлари кенгашининг 22-мажлиси тадбирлари бўлиб ўтади.
Эрдўғон ва Путин Ўзбекистондаги учрашувида Россиянинг Украинага қарши уруши масаласини кўтаради ва Эрдўғон Путинга “Туркия воситачилик ташаббуслари орқали урушни тугатиш ва доимий ўт очишни тўхтатишга эришиш учун қўлидан келган барча ишни давом эттиришини” етказади.
Бундан ташқари, Туркия президенти Зеленский ва Путин ўртасида Туркияда тўғридан-тўғри музокаралар ўтказиш таклифини такрорлайди ва “дипломатик ечимга урғу беради”.
