Сўкиш яна "тренд"да...

ЖАМИЯТ 03.10.2022, 19:57
Сўкиш яна "тренд"да...

Сўнгги пайтларда давлат амалдорлари, яъни ҳокимларнинг қўл остидаги ходимларга қўпол муомалада бўлиб, уларни "куракда турмайдиган сўз"лар ёхуд турли маданият чегараларини бузиб ўтувчи сўкиш сўзлар билан ҳақорат қилаётган аудиоёзувлар тез-тез қулоққа чалинадиган бўлиб қолди. Бу гап-сўзлар ҳатто давлат раҳбарининг ҳам қулоғига етиб борди ва ўз ўрнида уларга тегишли чора кўрилди, яъни эгаллаб турган лавозимидан"озод этилди"... Аммо бу қолган сўконғич амалдорларга мутлақо таъсир қилмаганлигини ҳамон улар мажлисларни ҳақоратли сўзлар билан ўтказаётганидан ҳам билсак бўлади. Худди шу мавзуда депутат Расул Кушербаев ўзининг ижтимоий тармоқлардаги саҳифасида қуйидаги фикрларни ёзиб қолдирди:

" Яқинда Президент Администрацияси раҳбари мажлисида бир қатор ҳокимлар ишдан олинди ва жазоланди. Ҳокимларнинг одоб-аҳлоқ меъёрларига зид ҳаракатлари танқид қилиниб, бу давлат хизмати обрўсига путур етказиши таъкидланди. 

Бироқ шу воқеадан кўп ўтмай давлат хизматчиларининг сўкиш билан боғлиқ одобсизликлари яна тармоқларда айлана бошлади. 

➖ Анъанани Тошлоқ тумани ҳокими давом эттирди. Туман ҳокими, деб айтилаётган аудиода ҳокимнинг оғзидан чиқаётган гапларга илон пўст ташлайди. 

Камига ўз гапида ҳоким ҳудуднинг мутлақ ҳукмдори сифатида ҳар қандай қарорни кенгаш депутатлари тасдиғидан ўтказа олишига ишора қилади.

Демак, Тошлоқ тумани кенгаши депутатлари ҳокимни измидан чиқа олишмайди ёки ҳоким оширворди. Феодализм.

➖ Кейинги ҳолат Тошкент вилоятининг Оққўрғон туманидаги собиқ ИИБ ходими билан боғлиқ. 

Ходим номус чегарасидан ўтиб, бутун ўзбекистонликларни бўралатиб сўкди, оққўрғонлик эркакларни ор-номусини ерга урди.

Икки ҳолатда ҳам давлат хизматчилари ўзларининг маънавиятсиз, давлат ишига номуносиб эканликларини кўрсатишди. 

Ушбу ҳолатлар давлат хизматига кадр танлашда жиддий нуқсон борлигини кўрсатмоқда. Яъни кадрнинг маънавий дунёси, ҳулқи ва муомила маданияти қандайлигига қаралмайдиган кўринади.

Инсон қанчалик билимли, уддабурон бўлмасин, маънавияти юксак бўлмаса, иш олиб боришда  зўрлик ва сўкинишга таяниши мумкин экан.

Бундай кадрнинг ҳеч қандай қиймати йўқ ва ундайлар давлат хизматида бўлиши мумкин эмас. 

Менимча, бунга давлат хизматига кадр танловчи масъуллар принципиал қоида сифатида қарашлари керак. Акс ҳолда ер юзида ўзбекистонликлар ўзларига хизмат қилувчи амалдорларининг сўкиши остида яшайдиган халқ бўлиб қолаверади."

Шарҳлар

Об-ҳаво: Тошкент
+-1.03° tumanli
Валюта курси
11228.08
USD 24.95
11723.24
EUR 119.04
183.66
RUB -0.25
1