Фарғона водийси божхона органлари махсус печларда 9000 қути контрабанда сигаретини ёқиб юборишди. Сабаби бутун партия мамлакатга чет элдан ноқонуний олиб кирилган бўлиб, акциз маркалар ҳамда Ўзбекистон маркировка рақамли кодларисиз эди.
Албатта, кўрилаётган чоралар контрабандага қарши курашишда ёрдам беради, аммо уларнинг ўзи етарли эмаслиги аниқ. Агар рақамларга мурожаат қилсак, жорий йилнинг 9 ойи давомида Ўзбекистон божхона хизмати бундай қонунбузарликларнинг 35 та ҳолатини аниқлади ва жами 1,7 млрд сўмлик 214 минг қути ноқонуний сигарет мусодара қилди.
Қайд этиш ўринлики, бугунги кунда Фарғона водийсидаги ҳар бешта сигаретнинг бири – ноқонуний! Ноқонуний сигаретлар бозорини ўрганиш кўрсатишича, Фарғона водийсида назорат суст – барча кўрилаётган ҳаракатларга қарамай, ўсиш 20,4%гача.
Контрабандани енгиш учун вилоятда назоратни кучайтириш, контрабанда тамаки маҳсулотини йўқ қилиш бўйича рейдлар ва чора-тадбирларни ошириш керак.
Маълумот учун, аввалроқ Фарғонада умумий қиймати 200 млн. сўмдан ортиқ бўлган 20 минг 697 қути қалбаки сигареталар сотуви олди олингани ҳақида хабар бергандик.
