ДХХ ходимлари тезкор тадбирлар давомида солиқ тизими ва маҳаллий ҳокимиятда ишлаган мансабдорларни ноқонуний пул олган вақтида қўлга олди.
Самарқанд вилоятида коррупция билан боғлиқ икки ҳолат аниқланди. Давлат хавфсизлик хизмати ходимлари томонидан ўтказилган тезкор тадбирларда солиқ тизими ва маҳаллий ҳокимиятда ишлаган мансабдор шахслар ноқонуний равишда пул олган вақтида ушланди.
Маълум қилинишича, Булунғур туманида фаолият юритувчи “Бухгалтерия маркази” давлат муассасаси ҳисобчиси фермер хўжалигига ҳисобланган 150 миллион сўмлик солиқ қарздорлигини камайтириб беришни ваъда қилган. Бунинг эвазига у фермер хўжалиги раҳбаридан аввал 3 миллион сўм олган.
Кейинчалик ҳисобчи қўшимча 15 миллион сўм талаб қилиб, ушбу маблағни Булунғур тумани солиқ инспекцияси бошлиғи ўринбосари билан биргаликда олаётган вақтида ДХХ ҳамда ИЖҚКД ходимлари томонидан ашёвий далиллар билан ушланган.
Яна бир ҳолат Каттақўрғон туманида қайд этилди. 2025 йилда туман ҳокими ўринбосари лавозимида ишлаган шахс фуқарони туман тиббиёт бирлашмасига ишга жойлаштириб қўйишни ваъда қилиб, эвазига 14 миллион сўм олгани аниқланган. Аммо у ўз ваъдасини бажармаган.
Тезкор тадбир давомида ҳозирда собиқ ҳоким ўринбосари бўлган мазкур шахс олган пул маблағининг бир қисми сифатида 1000 АҚШ долларини қайтариб бераётган вақтида фош этилган.
Ҳозирда ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда.
