Жиноят ишлари бўйича Шайхонтоҳур тумани судининг очиқ суд мажлисида қасддан одам ўлдириш жиноятини содир этганликда айбланган, 1999 йилда туғилган жиноятчи оид суд иши кўриб чиқилди, дея хабар бермоқда "darakchi.uz" мухбири.
Маълум қилинишича, қотиллик воқеа юз берган кўп қаватли уйларга ўрнатилган кузатув камералар сабаб қисқа муддатда очилган. 2022 йилнинг 26 май кунидан 27 май кунига ўтар кечаси тунги соат 01:30 Чилонзор тумани, Қатортол-Ал-Хоразмий кўчасига борган йигит бир қиз билан 600 000 сўм эвазига эрталабгача "бирга бўлиш"га келишган ва хонадонда у билан жинсий алоқа қилган. Йигит қиз билан гаплашиб уни таниб қолади. Орада бўлиб ўтган воқеалар эсланиб иккаласи торишиб қолади ва йигит қизни бўғиб ўлдиради.
Суд залида айбдор айбига иқрор бўлди.
"Онамдан сўкиб ҳақорат қилди. Қизнинг менга айтган сўзларидан қаттиқ ғазабим келиб, жаҳлим чиқиб кетди. Кейин уни бўғиб ўлдирдим. Жиноятни яшириш учун унинг юзини целлофан билан ўраб, устидан изолента билан ўрадим. Қизни кондиционер қутисига унга тегишли бўлган нарса-буюмлар билан бирга жойлаштирдим. Қутини устидан скотч билан ўраб, такси чақирдим. Қутини уйнинг подъездидан ўзим судраб чиқдим. Мурдани "Бўзсув" каналининг қирғоғига олиб бориб, такси кетиб бўлганлигига ишонч ҳосил қилгач, мурда жойлаштирилган қутини канал қирғоғига ташлаб юбордим", - дейди.
Суд-тиббиёт экспертизасининг хулосасида жабрланувчининг ўлими "юқори нафас йўлларининг юмшоқ жисм билан беркилиши ва бўйин аъзоларининг сиқилиши оқибатида келиб чиққан механик асфикциядан" юз берганлиги кўрсатилган.
Суд ишида прокурор судланувчини жиноят кодексининг 97-моддаси 2 қисми "В" банди билан айбдор деб топишни ва 15 йилга озодликдан маҳрум қилишни сўради.
Иш атрофлича кўриб чиқилиб, суд ҳукми ўқилди. Унга кўра, судланиувчи Ўзбекистон Республикаси Жиноят кодексининг 97-моддасининг 1-қисмида назарда тутилган жиноятни содир этганликда айбдор деб топилди ва унга 12 йил озодликдан маҳрум этиш жазоси тайинланди. Тайинланган жазони умумий тартиб колонияларида ўташ белгиланди. Жазони ўтиш муддати 2022 йил 2 июндан бошлаб ҳисобланади.
