Давлат хавфсизлик хизмати ҳамда Иқтисодий жиноятларга қарши курашиш департаменти ходимлари томонидан ер майдонини ноқонуний расмийлаштириш билан боғлиқ ҳолат фош этилди.
Маълум қилинишича, Тошкент шаҳрида яшовчи, 1979 йилда туғилган шахс тадбиркорлик фаолиятини йўлга қўймоқчи бўлган фуқаронинг ишончига кирган. У Янгийўл туманида жойлашган ва давлат захирасида бўлган 1,5 гектар ер майдонини архитектура ҳамда кадастр тизимида ишловчи мансабдор танишлари орқали унинг номига расмийлаштириб беришни ваъда қилган. Эвазига эса 750 минг АҚШ доллари талаб қилган.
Тезкор тадбир давомида ушбу шахс сўралган маблағнинг бир қисми сифатида олдиндан 20 минг АҚШ долларини олган вақтида ашёвий далиллар билан ушланган.
Ҳозирда мазкур ҳолат юзасидан жиноят иши қўзғатилган бўлиб, тергов ҳаракатлари олиб борилмоқда.
