Фарғона вилоятида контрабанда йўли билан олиб кирилган гиёҳвандлик воситалари ҳамда кучли таъсир қилувчи дори препаратларининг ноқонуний айланмасига чек қўйилди. Бу ҳақда Давлат хавфсизлик хизмати маълум қилди.
Қайд этилишича, ДХХнинг Фарғона вилояти бўйича бошқармаси ходимлари Ички ишлар ва Божхона органлари билан ҳамкорликда тезкор тадбир ўтказган.
Тадбир давомида Қўқон шаҳри ҳудудида ҳаракатланаётган Damas русумли автомашина тўхтатилган. Автомобилни Фарғона туманида яшовчи, 1995 йилда туғилган фуқаро бошқариб кетаётган бўлган.
Автомашина ҳолислар иштирокида кўздан кечирилганда, унинг салонидан 2 килограмм 40 грамм “гашиш” гиёҳвандлик воситаси ҳамда 5600 дона “Регапен” кучли таъсир қилувчи дори воситаси топилган ва белгиланган тартибда мусодара қилинган.
Терговга қадар текширув жараёнида гумонланувчи мазкур гиёҳвандлик воситаларини Қирғизистон ҳудудидаги жиноий шеригидан қабул қилиб олгани ҳамда уларни Қўқон шаҳрида сотишни режалаштиргани аниқланган.
Мазкур ҳолат юзасидан Давлат хавфсизлик хизматининг Фарғона вилояти бўйича бошқармаси томонидан Жиноят кодексининг 246-моддаси, 251-1-моддаси ва 273-моддалари билан жиноят иши қўзғатилган.
Гумонланувчига нисбатан “қамоқ” эҳтиёт чораси қўлланилган.
