Фарғонада янги балиқ тури кашф қилинди. Бу ҳақда Фарғона давлат университети Зоология ва умумий биология кафедраси мудири, олим Бахтиёр Шералиев маълум қилди.
Янги кашф қилинган Сўх ялангбалиғи (Triplophysa daryoae) ҳақида энди Википедиянинг ўзбек, рус ва инглиз тилидаги версияларида ўқишингиз мумкин. Янги балиқ туримиз халқаро ахборот базаларини забт этишни бошлади, дейди олим ўз ижтимоий саҳифасида.
“Сизларни Фарғона водийсидан кашф қилинган янги балиқ туримиз билан таништиришга рухсат бергайсиз. Сўх ялангбалиғи — (Triplophysa daryoae) Triplophysa daryoae Sheraliev, Kayumova & Peng, 2022”, — дейди Бахтиёр Шералиев.
Маълум қилинишича, кашфиёт ҳақидаги мақола халқаро "Zookeys" журналида чоп этилган.
“Ушбу тадқиқот ишини якунлашда ҳаммуаллифим Ёрқиной Қаюмованинг ҳиссаси катта бўлди. Фурсатдан фойдаланиб, Ёрқиной опага ўзимнинг самимий миннатдорчилигимни билдириб қоламан. Янги балиқ турини севимли қизим Дарё Шералиева шарафига "Triplophysa daryoae "деб номладим. У улғайгач, бу қароримдан ва унинг исми фан тарихига муҳрланганидан хурсанд бўлади деб умид қиламан”, — дея қўшимча қилди Бахтиёр Шералиев.
Янги тур Сўх эксклавидан оқиб ўтувчи Сўх дарёсида кашф этилган.
