Кеча, 30 октябрь куни Исландияда бўлиб ўтган Фишер шахмати бўйича Жаҳон чемпионати ўз ниҳоясига етди.
Унда Нодирбек Абдусатторов учинчи ўрин учун кечган баҳсда Магнус Карлсенга қарши дона сурди. Дастлабки партияни ўз фойдасига ҳал қилган Нодирбек кейинги учта ўйинни бой берди.
Шу тариқа ўзбекистонлик шахматчи мазкур мусобақада тўртинчи ўрин билан чекланди ва 40 минг доллар мукофот пулига эга бўлди. Финалда АҚШ вакили Ҳикару Накамура эса россиялик Ян Непомняшийни енгиб, чемпионга айланди.
Саккиз нафар гроссмейстер иштирок этган мусобақада Ўзбекистон вакили Абдусатторов ўз гуруҳида биринчи ўринни эгаллаб, ярим финалга чиқди. Финал йўлида Нодирбек Накамурага енгилганди.
