Норасида нархи 35 000 долларми? Тошкентда чақалоқ ҳали туғилиб улгурмасидан аввал "тарозида тортилди" (видео)

ЖИНОЯТ 18.11.2022, 00:02
Норасида нархи 35 000 долларми?  Тошкентда чақалоқ ҳали туғилиб улгурмасидан аввал "тарозида тортилди" (видео)

Аёл — кимлар учундир хас, ким учундир муқаддас бир тимсол. Уни эътибор, марҳамат олови ила ёқсанг, бутун дунё тафтидан ёришиб кетади. Аммо унинг қалбига қоронғулик кириб борар экан, у музёрар тошга айланиши ҳеч гап эмас. 

Айни кунларда жамиятда аёллар ўртасида юз бераётган турли жиноий вазиятлар ортида ана шу охирига етиб бўлмас қоронғуликлар тургандек. Одатда шу туфайли бирор ҳайратомуз иш юз берганда қийинчилик, етишмовчилик, деган салбий сифатларга ўраб, далил қилиб кўрсатилади.

Бугун, 17 ноябрь санасида юқоридаги сўзларимизга айни мисол бўла оладиган аёлга суд ҳукми ўқилди. Жиноят ишлари бўйича Бектемир туман судида 1994 йилда туғилган аёлнинг чақалоқ савдосига оид жиноят иши кўрилди.

Энг ачинарлиси, у 2 кунлик гўдагини сотмоқчи бўлган.

Хўш, бунга нима сабаб бўлган эди? Ким уни бу қабиҳликка ундади? 

Судланувчи аммасининг кўрсатмасига кўра, жиноятчи бухоролик шахс билан иккинчи турмушини қуради, у шаръий никоҳидаги аёлини ҳомиладор эканини билиб, қайтиб кетади ва ўша ерда бошқа инсонга уйланиб олади.

Шу орада моддий ва маънавий қийинчиликлар гирдобида қолган аёл 600 АҚШ доллари миқдоридаги қарз ичида бош чангаллаб қолади ва норасидаси ҳали туғилиб улгурмай "савдолаша кетади".

Болани пуллашга сабаб ҳам айни шу бўлган.

"2022 йилнинг апрель ойида ҳомилам 7 ойлик бўлган вақтида Сирғали туманида истиқуомат қиладиган аммамнинг уйида яшаб келаётгандим. Ўша ерда танишим билан учрашиб қолдим. Уни бир неча йиллардан бери болали бўлолмаётганлигини билганман. Шунда унга кўчадан 600 АҚШ доллари қарзим борлигини, 600 АҚШ долларини берса, ҳозироқ болани кесерча кесиш усулида туғиб уларга беришимни айтдим. Танишим бола 9 ойлик бўлиб туғилиши кераклигини, ҳозирда пули йўқлигини маълум қилди. Орадан бир неча ҳафта ўтгандан сўнг, унга бир неча бор қўнғироқ қилиб, пул кераклигини, 100-200 АҚШ доллари бериб туришини сўрадим. У менга ишонмаслигини, бу борада бир неча бор алданганлигини, бола унга керакмаслигини, ҳозир пул бермаслигини айтди. Сўнг, танишим менга қўнғироқ қилиб, кўришишни сўради, кўришдик. У менга нотаниш бўлган 2 та аёллар билан бирга келди. Улар билан бола мавзусида гаплашдик. Болани қанчага сотишимни сўрашди. Уларга бошида суммасини айтмадим. Улар дангал гапиришимни, болани сотгандан сўнг, қайтариб олмаслик учун хоҳлаган суммамни айтишимни сўрашди. Кўчадан қарзларим борлигини, ўша қарзларимни ёпсам бўлгани эканини айтдим. Танишим менга болани сотишим эвазига уй олишим мумкинлигини айтди. Шунда, уйим йўқлиги учун танишимга 35.000 АҚШ долларига болани сотишимни маълум қилдим", — дейди судланувчи.

Маълум бўлишича, аёл 2022 йилнинг 15 июнь куни у танишига қўнғироқ қилиб, 8-сонли туғуруқхонада эканини, дарди бошланганлигини айтади. Тахминан соат 14:00 ларда ўғил фарзандли бўлади. 16 июнь куни эса З.исмли аёл янги туғилган чақалоғига туғилганлик тўғрисидаги гувоҳнома олиб берган.

"Уларга туғишимдан олдин танишим шифокор мендан туғдиргани учун 200 АҚШ доллар сўраётганлигини, ўша бериладиган 35.000 АҚШ долларидан 200 АҚШ долларини олиб келиб беришлигини сўраганман. Шу билан З.исмли аёл билан гаплашганимда улар 17 июнь куни туғруқхонадан чиққан вақтимда шифокорга 200 АҚШ долларини бериб юборишини айтди", — дейди у.

Қайд этилишича, 17 июнь куни таниши билан гаплашади ва болани олиб кетгани келишини айтади. Лекин пул масаласида аниқ фикр билдирилмагани учун унга келмаслигини, болани бермаслигини таъкидлайди. Таниши ҳам “бўлди бола керакмас”, дейди шунда. 

"Сўнг олдимга З.исмли аёл келиб чақирди. Танишим жаҳлдалигини, 35.000 АҚШ долларини олиб келаётганини айтди. Сўнг олдимга танишим келиб, жаҳли чиқиб кетганлигини, фикридан қайтмасдан болани беришимни сўради. 35.000 АҚШ долларини узатди. Танишим берган 35.000 АҚШ доллари пул маблағларини ўз қўлим билан олдим. Аммо пулларни санаб олмадим. Танишим сўраганлиги учун болани қайтариб олмаслигим тўғрисида ўз қўлим билан тилхат ёзиб бердим. Танишимга 35.000 АҚШ долларидан 200 АҚШ долларини олиб шифокорга ташлаб чиқишини айтдим. Шунда 200 АҚШ долларини олиб туғуруқхонанинг қабулхонасига бориб, шифокорга қўнғироқ қилганимда 200 АҚШ долларини қабулхонада ўтирган қизга ташлаб кетишимни айтди. Шифокорга 200 АҚШ доллар пулларни беришни мендан ҳеч ким талаб қилмаган ва сўрамаган. Пулни ўз ихтиёрим билан суюнчи тариқасида бериш учун борганман. Қайтиб кўчага чиқдим. 35.000 АҚШ долларидан қолган 34.800 АҚШ долларини солган пакетимни олиб, танишимга болага нимадур бўлса қўнғироқ қилишини айтиб кетмоқчи бўлган вақтимда олдимга бир неча нотаниш кишилар келишди. Гувоҳномаларини очган ҳолда кўрсатиб, ўзлигини Департамент, ИИВ ходимлари ва ҳолислар деб таништиришди", — дейди жиноятчи.

Судга оид кимёвий экспертизанинг хулосасига кўра, ўтказилган тадбир давомида судланувчининг ўнг ва чап қўл бармоқларидан суртиб олинган бинт бўлаклари; юзасидан суртиб олинган бинт бўлаги; махсус кукун суртилиб пулларга ишлов берилган бир дона оқ рангли бинт бўлагидан топилган кукун моддаларида – махсус кимёвий кукун моддаси борлиги аниқланиб таққослаш учун юборилган махсус кимёвий кукун суртилган бинт бўлаги стардарт намунага нурланиш ранги билан турдош; 1 дона 50 АҚШ доллар купюрасини улътра-бинафша нур остида қоронғу хонада аналитик чироқ ёруғлигида кузатилганда, унинг иккала томонига (ПОРА) ёзуви ёзилган бўлиб, улар тўқ сариқ рангда товланди ва стандарт-наъмуна қоғоз бўлагидаги “ПОРА” ёзувли қалам чизиқлари билан бир бирига турдош бўлиб чиққан.

Суд ҳукмига асосан судланувчи Жиноят кодексининг 135-моддаси 3-қисми "а" банди билан айбли деб топилди ва унга ЖКнинг 57-моддасини қўллаб, 5 йил озодликдан маҳрум қилиш жазоси тайинланди.

Шу ўринда айтиб ўтиш лозимки, ҳар бир инсон, қай бир сабаблар билан бўлсинки, қилган айби, жинояти учун жазо ўташи шарт ва зарур. Бироқ ҳар бир аёл ва қиз ўз тафаккури ҳамда келажаги устида бош қотирмас экан бунинг қурбони тирик етим гўдаклар бўлиб қолаверади.

Дилбар Абдунабиева.

Шарҳлар

Об-ҳаво: Тошкент
+0.97° ҳаво очиқ
Валюта курси
11203.13
USD -9.84
11604.20
EUR -18.04
183.91
RUB 0.29
1