Аввалроқ Тошкент шаҳрининг Янгиҳаёт туманида қурилиш крани қулаб тушгани ҳақида хабар берган эдик. Қурилиш вазирлиги ҳолат юзасидан қўшимча маълумот берди.
Қайд этилишича, объект бўйича Вазирлар Маҳкамасининг «Архитектура ва қурилиш соҳасида давлат хизматлари кўрсатишнинг маъмурий регламентларини тасдиқлаш тўғрисида»ги қарорига асосан Тошкент шаҳар Қурилиш бош бошқармаси лойиҳа-смета ҳужжатларини келишиш бўйича Архитектура ва шаҳарсозлик кенгаши ишчи органи томонидан хулоса берилган. Complex Graphics МЧЖ лойиҳа ташкилоти томонидан ишлаб чиқилган ишчи лойиҳани «Шаҳарсозлик ҳужжатлари экспертизаси» ДУК кўриб чиқиб, йиғма эксперт хулосаси олинган. Шунингдек, Қурилиш соҳасида ҳудудий назорат инспекциясидан ўрнатилган тартибда хабарнома юбориш йўли билан қурилиш-монтаж ишлари бошлаш учун рўйхатдан ўтган.
Инспекция томонидан қурилиш объектида мониторинг ишлари ўтказилган бўлиб, Omega Agro Stroy МЧЖнинг қурилиш ишлари бўйича маъсул ходимларига қурилишда йўл қўйилаётган камчиликлар, қурилиш даврида юритилиши керак бўлган ижро ҳужжатлари ўз вақтида юритилмаётганлиги ҳамда «Қурилишда хавфсизлик техникаси»нинг қурилиш майдонида меҳнат муҳофазаси ва техника хавфсизлиги қоидаларига риоя этилиши юзасидан «Давлат назорати» электрон тизим платформаси орқали кўрсатмалар берилган.
Шу билан бирга, инспекция томонидан 2022 йил 19 ноябрда қурилиш майдонидаги минора кранини демонтаж қилинаётган вақтда қулаганлиги юзасидан жойига чиқиб ўрганилганда, қурилиш объекти, қурилиш қатнашчилари ва кран бошқарувчисига ҳеч қандай жароҳат етмаган, ҳозир ушбу ҳолат бўйича ишчи гуруҳ ўрганиш ишлари олиб бормоқда.
