Бухоро вилояти божхона бошқармасининг Бухоро аэропорт чегара божхона пости ходимлари томонидан юртимиз ҳудудига қурол олиб киришга уринган шахс тўхтатиб қолинди. Бу ҳақда ЎзА ёзмоқда.
Унда “Шереметево-Бухоро” йўналишидаги авиарейс орқали учиб келган фуқаро “яшил” йўлак орқали ҳаракатланиш чоғида ўзининг хатти-ҳаракатлари билан божхона ходимларида шубҳа уйғотади. Шундан сўнг, мазкур фуқаронинг қўл юклари ҳамда кузатиб борилаётган багажи, рентген аппарати орқали божхона назоратидан ўтказилади.
Натижада йўловчи божхона декларациясида ёзиб кўрсатилмаган ва оғзаки сўровда маълум қилмаган “QUATTRO Trigger MOD 85” русумли, 4,5 мм. калибрли фуқаровий пневматик ов қуроли ва пружина-поршенли винтовка борлиги маълум бўлди.
Ҳозирда юқоридаги ҳолат юзасидан терговга қадар суриштирув ишлари олиб борилмоқда.
Маълумот учун, биргина Бухоро аэропорти чегара божхона пости ходимлари томонидан жорий йилнинг ўтган даврида 4 та ҳолатда қурол олиб киришга бўлган уринишга чек қўйилган.
