Қорақалпоғистон Ички ишлар вазирлиги Жиноят қидирув бошқармаси бўлими бошлиғи Полат Шамшетов Жиноят кодексининг 244-моддаси 3-қисмида назарда тутилган қилмиш — оммавий тартибсизликлар содир этганликда айбланмоқда. Бу ҳақда айни пайтда 2022 йил 1-2 июль кунлари Нукус шаҳрида содир этилган оммавий тартибсизликларга доир жиноят иши юзасидан Бухорода бўлиб ўтаётган очиқ суд мажлисида маълум қилинди.
Суд жараёнида иштирокчиларининг исмлари бирма-бир эълон қилинди. Аввалига асосий айбланувчилар - Даулетмурат Тажимуратов, Азамат Турданов ва Лолагул Каллихоноваларнинг исмлари тилга олинди.
Шунингдек, маълум қилинишича, айблов хулосасига кўра Нукус шаҳридаги тартибсизликлар натижасида 6 млрд. 681 млн. 247 минг 508 сўм моддий зарар етказилган.
Суд жараёни қорақалпоқ тилида олиб борилмоқда ва давом этмоқда.
Эслатиб ўтамиз, судда 22 кишига нисбатан жиноят иши кўриб чиқилмоқда.
