Сурхондарё вилояти Бойсун туманининг Темирдарвоза маҳалласида яшаган Иккинчи жаҳон уруши қатнашчиси Шоҳимардон Ҳамроев 105 ёшида вафот этди.
Шоҳимардон ота Иккинчи жаҳон уруши йилларида Воронеж, Латвия, Литва ва Эстония ҳудудларида кечган жангларда иштирок этган. У фронт ортида эмас, бевосита қирғинбарот майдонларда Ватан ҳимояси учун курашиб, оғир ва машаққатли синовларни матонат билан енгиб ўтган.
Замондошлари ва яқинлари уни юртга садоқат билан хизмат қилган, бурч ва масъулиятни ҳаётининг мазмунига айлантирган инсон сифатида эслайди.
Уруш тугаганидан сўнг Шоҳимардон Ҳамроев бутун умрини таълим соҳасига бағишлади. Педагогика йўналишида таҳсил олиб, қарийб 40 йил давомида рус тили фани ўқитувчиси сифатида фаолият юритди. Унинг меҳнати ва фидойилиги туфайли юзлаб ёшлар билим ва тарбия олди.
Кўп йиллик самарали меҳнати учун Шоҳимардон Ҳамроев “Ўзбекистон Республикаси халқ таълими аълочиси” кўкрак нишони билан тақдирланган.
Эътиборлиси, Шоҳимардон ота Сурхондарё вилоятида ҳаёт бўлган сўнгги Иккинчи жаҳон уруши қатнашчиси эди. Унинг вафоти нафақат вилояти, балки бутун мамлакат жамоатчилиги учун катта йўқотиш бўлди.
Марҳумнинг оила аъзолари ва яқинларига ҳамдардлик билдирилади.
