Туркиядан Ўзбекистонга биринчи марта йўналиши ташкил этилган илк юк поезди Тошкентга етиб келди. Тантанали маросимида "Ўзбекистон темир йўллари" АЖ бошқаруви раиси Х.Хасилов, Туркия Республикасининг Ўзбекистондаги Фавқулодда ва Мухтор элчиси Олган Бекар ҳамда Туркия темир йўллари вакиллари иштирок этди. Бу ҳақда zamon сайти хабар берди.
2022 йил ноябр ойида Самарқанд шаҳрида бўлиб ўтган ТДТ президентларининг саммити доирасида янги транспорт транзит коридорларини йўлга қўйиш ва ривожлантириш бўйича келишувга эришилган эди. Ушбу келишув натижасида Тошкентга Туркиянинг Измир шаҳридаги “Гумруҳ” станциясидан 40 та вагондан иборат биринчи юк поезди етиб келди.
Қайд этиш жоизки, ушбу поезд “Туркия – Эрон – Туркманистон – Ўзбекистон” йўналишида дастлабки юк поезди ҳисобланади. Ҳозирда ушбу йўналиш бўйича яна 250 дан ортиқ вагон келиши режалаштирилган.
Бундан ташқари, ташкил қилинган йўналиш катта ривожланиш салоҳиятига эга бўлиб, Ўзбекистон юкларини халқаро йўналишларда ташиш учун қўшимча йўналиш ҳисобланади. Шунингдек, тадбиркорлар учун Ўзбекистондан Туркияга экспорт юкларини жўнатишда ҳамда импорт юкларини олиб келишда энг тез ва қулай йўналишлардан биридир.
Ушбу амалга оширилаётган ишлар минтақадаги мавжуд транспорт-коммуникация тармоқлари ва инфратузилмасидан самарали фойдаланишга, шунингдек, ташқи савдо юкларини асосий жаҳон ва минтақавий бозорларга ташиш учун вақт ва молиявий харажатларни сезиларли даражада камайтиришга имкон беради.
