Украина президенти идораси FIFA’дан Қатарда бўлиб ўтаётган ЖЧ сўнгги учрашуви олдидан майдонда Владимир Зеленскийнинг тинчлик ҳақидаги мурожаатини эфирга узатишни сўраган. FIFA раҳбарияти Зеленскийнинг бу илтимосини рад этди. Бу ҳақда CNN хабар берди.
Хабарда айтилишича, Украина президенти идорасида FIFA’нинг илтимосни рад этиши ҳайрат билан кутиб олинган.
"Биз FIFA ўз майдонларидан яхши мақсадда фойдаланишни хоҳлайди деб ўйлагандик",– дейди Украина вакили CNN манбасига кўра.
Маълум қилинишича, рад жавоби олинишига қарамай, FIFA билан музокаралар давом эттирилмоқда.
Маълумот учун: Қатарда бўлиб ўтаётган жаҳон чемпионати финал учрашуви 18 декабрь куни Аргентина ва Франция терма жамоалари ўртасида Лусаил стадионида ўтказилади. Ўйин Тошкент вақти билан соат 20:00 да бошланади.
