Ижтимоий тармоқларда Ургут туманининг Ватак маҳалласида аёл ёш боласини шафқатсиз калтаклаётгани акс этган видео тарқалмоқда. Хабарда қайд этилишича, аёлнинг қайнонаси келини ҳали ёш невараларини доимий равишда қаттиқ калтаклаётгани, ўлдириб қўйишидан қўрқаётганини маълум қилган. Боласини калтаклаётган аёлнинг сўзларидан у турмуш ўртоғидан шу йўл билан қасд олишга урингани кўринган.
Видеода боланинг бурнидан қон келгани, шунга қарамасдан, она уни ураётгани акс этган. "Томоша қил, ҳайми, кайф қил… Сени касрингга бачаларинг ем бўлади. Кўриб томоша қил, мана бошланди, сенинг қилган қилиқларинг учун бошланди", — дея ерда ётган болани кўтариб, ерга урган.
Ҳолат юзасидан Ургут туман ҳокимлиги маълумот тақдим этди. Қайд этилишича, мазкур воқеа шу куннинг ўзида тегишли масъуллар томонидан ўрганилиб, она ҳамда унинг фарзандини соғлиғи ва руҳий ҳолати мутахассислар назоратига олинган.
"Ҳолатга ҳуқуқни муҳофаза қилувчи органлар томонидан ҳуқуқий баҳо берилади", - дейилади хабарда.
