Энергетика вазирлиги "Қишдан чиқиб олиш учун ҳаммамиз биргаликда энергияни иқтисод қилайлик!", деган шиор остида аҳолига мурожаат билан чиқди.
“Хатоларимиз сабабли совуққотяпмиз. Аммо ҳозир, шу лаҳзада, бир мушт бўлиб, жамият бўлиб қиш совуғидан ўтиб олмасак бўлмайди. Бу бизнинг қўлимиздан келади. Ҳар биримиз энергияни иқтисод қилишга уринсак, талафотларни камайтиришимиз мумкин бўлади”, дейилади анимацион роликда.
Унда мустақилликдан сўнг энергетика тизимига қилинган эътиборсизлик туфайли, бугунги кунда электр энергиясини етарлича ишлаб чиқариш учун керак бўлган ёқилғи – табиий газ етмаётгани рақамлар билан тушунтириб берилган.
Анимацион лавҳада 2016 йилдан буёғига аҳоли ва иқтисодиётни энергия билан таъминлаш соҳасида бажарилган ишларнинг сарҳисоби келтирилади.
Соҳада олиб борилаётган ишлар натижасига қадар, бу йилги совуқ қишдан имкони борича талафотларсиз ўтиб олиш учун бутун халқнинг ҳаракати, жонбозлиги керак бўлаётгани таъкидланади.
