Ижтимоий тармоқ фаоллари онлайн платформаларда сотувга қўйилган метан заправкалар сони бирдан кўпайиб қолганига эътибор қаратишмоқда.
Бунга Ўзбекистонда ҳаво ҳароратининг кескин совиши туфайли юзага келган оғир энергетик инқироз сабаб шу йўналишдаги тадбиркорлар устидан кучли назорат ўрнатилганлиги сабаб бўлгани айтилмоқда.
Иқтисодчи Отабек Бакиров бунга ҳайрон бўлмаслик кераклигини, охирги ўн йилликларда Ўзбекистонда гуркираб кенгайган бизнес охирги ойларда жуда оғир дамларни бошдан кечирмоқда эканлигини ёзади.
"Расмий рақамларга кўра ойига 200 млн куб, йилига 2,5 млрд куб (норасмий рақамлар янада кўпроқ) газ сотган бизнес мана қозонни сувга ташлаганига яқинда икки ой бўлади. Метан заправкаларнинг аксари кредитларда ё аффилланган бизнеслар пул оқими учун гаровларда экани ҳисобга олинса, туман истиқболда янада қуюқлашади.
Лекин ҳар қандай бизнесда бўлгани каби метан заправкалар ҳам ушбу кризисни янги имкониятлар учун чақириқ деб қабул қилишлари керак. Трансформация, яъни бензин сотуви, суюлтирилган газ сотуви билан диверсификация яратса бўлади. Ва албатта, кунлар исиб, импорт йўлга қўйилиб, газ таъминоти тикланган тақдирда ҳам, ресурслар учун кураш аввалгидек бўлмаслиги ҳисобга олиниши даркор. Газ энди қимматроқ тўлаганники бўлади”, дея таъкидлади Отабек Бакиров.
Эслатиб ўтамиз, жорий йилнинг 12 январь санасида Ўзбекистондаги барча "Метан заправка"лар яъни газ тўлдириш компрессор шохобчалари фаолияти қисқа муддатга вақтинча тўхтатилган ва 16 январдан улар маълум бир чекловлар ўрнатилган ҳолда ишлашни бошлаган эди.
Ўзбекистонда газ тўлдириш компрессор шохобчалари фаолиятига чекловлар қўйилишини Энергетика вазирлиги табиий газни биринчи навбатда аҳоли хонадонлари, электр энергияси ишлаб чиқарувчи корхоналар ҳамда ижтимоий соҳа объектларига етказиб бериш чоралари кўрилаётганлиги билан изоҳлаган эди.
Метан заправка эгаларидан бирининг сўзларига кўра, охирги ойларда иш фаолияти одатий режимда амалга оширилмаётганлиги сабабли жиддий зарар кўрилган ва иш фаолиятини ташкил этиш учун олинган қарз маблағларини қайтаришда муаммолар юзага келган. Бу ҳақда у Kun.uz берган интервьюсида айтган.
