Қирғизистон Олий суди собиқ президент Алмазбек Атамбаевга нисбатан чиқарилган ҳукмни бекор қилди ва жиноий ишни қўшимча терговга жўнатди. Бу ҳақда "Спутник Қирғизистон" хабар бермоқда.
Маълум қилинишича, бундай қарор адвокатларнинг аризасидан сўнг Олий суд томонидан қабул қилинган.
Бу иш юзасидан Атамбаев колонияда сақланмоқда. Ҳукмнинг бекор қилиниши собиқ президентнинг ҳибсдан озод этилиши мумкинлигини англатади, дейилади хабарда.
Маълум бўлишича, Атамбаев тарафдорлари собиқ президент сақланаётган Молдовановкадаги колония яқинида йиғилишди. Улар собиқ президентнинг бугун озод этилишини кутишмоқда.
Атамбаев яқин 5-10 дақиқада қўйиб юборилиши мумкин, унинг буюмлари аллақачон машинада, деди собиқ депутат Рискелди Момбеков.
"Адвокатлар Бишкекнинг Первомай туман суди қарорини олиб келиб, колонияга киришди. Улар исталган дақиқада чиқиб кетишларини кутамиз", - деди собиқ депутат.
Эслатиб ўтамиз, 2011-2017 йилларда Қирғизистон Президенти бўлган Алмазбек Атамбаев 2019 йилда ҳибсга олинган. Шундан сўнг унга турли айбловлар эълон қилинган эди. Қирғизистон собиқ президенти Алмазбек Атамбаевга 2020 йилнинг октябрь ойида ҳокимиятни куч билан эгаллаб олишга уриниш ва оммавий тартибсизликларни ташкиллаштириш айбловлари эълон қилинган.
