АҚШнинг Бруклин туманида истиқомат қилган ва 2022 йилнинг 26 июнида бедарак йўқолган 43 яшар ўзбекистонлик Шеҳроз Тоҳировнинг жасади топилди. Прокуратура баёнотига кўра, жасад отиб ўлдирилган. Бу ҳақда "Америка овози" хабар бермоқда.
Суд ҳужжатларига кўра, Шеҳроз Тоҳиров умрининг сўнгги кунида гурзин миллатига мансуб икки бизнес шериги билан қиммат соатлар савдоси юзасидан учрашган. Ҳозирда улардан бири қўлга олинган, иккинчиси АҚШдан қочиб кетган.
Маълум қилинишича, улар Тоҳировдан 500 минг доллар талаб қилишган. Шеҳроз Тоҳиров йўқолган куни ушбу маблағнинг бир қисмини тўлаш мақсадида чиқиб, қайтмаган.
Қидирув-суриштирув хулосасида келтириллишича, Тоҳиров 25 июнь куни эрталаб уйидан 100 минг доллар атрофида нақд пул билан чиққан. Терговда аниқланишича, у гурзинлардан бирига ана шу маблағни, банк ҳисобидан ечилган яна 30 минг доллар ва “Mersedes-Benz” автомашинасини, шунингдек, 20 минг долларлик банк чеки ва 10 минг доллар нақд пул берган.
Ўша куни кечки соат 17:40 ларда пулларни олган гурзин Пенсилвания штатининг Хантингтон шаҳрига бориб, 2500 долларга “Малибу” автомашина ва иккита катта сумка сотиб олаётгани кузатув видеокамераларига тушган.
Терговчилар ушбу “Малибу”дан топилган қон излари Тоҳировникига мос эканини аниқлаган.
21 февраль куни федерал агентлар Бруклиндан қарийб 200 километр олисдаги Элленвил шаҳрида жойлашган уйнинг орқа ҳовлисида иккита катта сумкага жойлаб кўмилган жасадни топишган. Бу сумкалар Грузияга учиб кетган гумонланувчининг ўтган йили 25 июнь куни Бруклиндан сотиб олган сумкалари билан бир хил. У ердан, шунингдек, Тоҳиров йўқолган куни эгнида бўлганга ўхшаш кийим-кечаклар ҳам чиққан.
Ҳозирда суд далиллар етарли эмас, деб топиб гумондор гурзинни гаров эвазига қўйиб юборган.
