Ижтимоий тармоқларда Қашқадарё вилояти Китоб тумани тиббиёт бирлашмаси шифокорининг таъмагирлик қилаётгани акс этган видеолавҳа эълон қилинди.
Соғлиқни сақлаш вазирлиги Матбуот хизматининг маълум қилишича, мазкур ҳолат бўйича зарур чора-тадбирлар белгилаган.
Хусусан, туғуруқ бўлими акушер-гинекологи Х.Г. ва доя Н.Н. ишдан бўшатилиб, тўпланган дастлабки ҳужжатлар ҳуқуқни муҳофаза қилиш идораларига тақдим этилди.
Айни пайтда вазирлик ва ҳуқуқ-тартибот идоралари ҳамкорлигида ўрганиш ишлари олиб борилмоқда. Унинг натижалари бўйича қўшимча маълумот тақдим этилади.
❗️Эслатиб ўтамиз, вазирлик тизимда коррупциянинг ҳар қандай кўринишига нисбатан муросасиз муносабатда бўлади ва бу борадаги ҳеч бир мурожаатни эътибордан четда қолдирмайди.
📲 Жумладан, Соғлиқни сақлаш вазири Амрилло Иноятовнинг (+998-91) 403-17-73 шахсий телефон рақами орқали соҳадаги коррупциявий ҳолатлар юзасидан аниқ факт ва далилларга асосланган мурожаатлар қабул қилинмоқда.
☎️ Қолаверса, вазирлик қошида куну тун "1003" қисқа рақамли “Сall-марказ”, Қорақалпоғистон Республикаси Соғлиқни сақлаш вазирлиги, Тошкент шаҳар соғлиқни сақлаш Бош бошқармаси ва вилоятлар бошқармалари қошида "1103" қисқа рақамли “Сall-марказ”лар ишлаб турибди.
Соғлиқни сақлаш вазирлиги
Матбуот хизмати.