Хоразм вилоятининг Янгиариқ туманида 2022 йил август ойида 11 эркак 2006 йилда туғилган, вояга етмаган қизни зўрлаган бўлиши мумкин. "kun.uz"нинг ёзишича, бу ҳақда блогер Никита Макаренко 1 апрель куни пост қолдирган.
"Афтидан педофиллар тармоғини фош этиш учун Тошкентдан Хоразмга махсус гуруҳни юбориш керак шекилли. Ўқувчимнинг ёзишича, маҳаллий ИИБ билан алоқадор одамлар жиянини зўрлаган. У ўз исми шарифини ошкор этилишини истамади, аммо телефон рақамларини Тошкентдаги ҳуқуқ-тартибот идораларига етказишга рухсат берди", деб ёзган у.
Шундан сўнг, 4 апрель куни блогер 11 кишидан 3 киши ҳибсга олингани, бунга болалар омбудсмани Алия Юнусова ёрдам бергани ҳақида ёзди.
"Болалар омбудсмани Алия Юнусовага раҳмат. У ушбу постга жавоб қайтарган ва Хоразм вилоятидаги зўрлаш қурбони бўлган вояга етмаган қизни ҳимоя қилишни истаган ягона шахсдир. Қолганларнинг ҳаммаси жим. У Урганчга жўнаб кетди ва жабрланувчининг холаси айтганидек, бугун зўрлашда иштирок этган 11 кишидан 3 нафари ҳибсга олинди", деб ёзди Макаренко.
Қизнинг холаси бундан хурсанд бўлган ва "Қувончимизнинг чегараси йўқ. 8 ой давомида ҳеч ким бизга эътибор бермаган эди", деган.
Ҳолат юзасидан расмий изоҳ берилмади.
Эслатиб ўтамиз, сал аввал Хоразмда Адлия ва ФВБ бошлиқлари мехрибонлик уйининг 15-16-17 ёшли қизларини 10 ой давомида зўрлаб келгани хабар қилинган эди.
