Сўнгги кунларда Маданият ва туризм вазирлиги томонидан project.gov.uz порталида эълон қилинган "Karvon" телеканалини ташкил этиш чора-тадбирлари тўғрисида"ги Қарор лойиҳаси фаол муҳокама қилинмоқда. Яъни янги "Karvon" телеканали "Маданият ва маърифат" телеканалининг тугатилиши ҳисобига ташкил этилиши жамоатчиликнинг норозилигига сабаб бўлмоқда.
Сал аввал, Маданият ва туризм вазири Озодбек Назарбеков ўз муносабатини билдириб, бу борада ҳар бир таклиф қабул қилинишини маълум қилган эди. Айни пайтда телеканал директори Воҳид Луқмонов ҳам буҳокамадаги масалага ўз муносабатини эълон қилди.
"Аввало, “Маданият ва маърифат” телеканали фаолиятига оид ҳужжат лойиҳаси ишлаб чиқилаётганидан хабаримиз бор эди. Телеканал фаолиятини ҳар томонлама (ғоявий-бадиий, молиявий-иқтисодий, техник-технологик жиҳатдан) ривожлантириш, телеканални янада кўримли қилиш бўйича ўзимизнинг аниқ таклифларимизни берган эдик. Афсуски, жамоатчилик муҳокамаси учун эълон қилинган Ҳужжат лойиҳасида бизнинг таклифларимиз инобатга олинмаган.
Бу Ҳужжат ҳали лойиҳа. Ишонамизки, бу Лойиҳа қизғин муҳокама жараёнидан ўтиб, ҳамманинг фикр-мулоҳазалари, таклиф ва ғоялари инобатга олинган ҳолда, кенг жамоатчилик кутаётган Қарорга айланади.
Ўз навбатида миллий ўзлигимиз, маънавиятимиз ва маданиятимизга, ўзбек зиёлилари, санъат ва маданият фидойиларининг минбари бўлган - “Маданият ва маърифат” телеканали тақдирига бефарқ бўлмасдан ўзларининг конструктив муносабатларини билдираётган барчага миннатдорлик билдирамиз", - деган телеканал раҳбари.
Шунингдек, Қонунчилик палатаси Спикерининг ўринбосари, Конституциявий комиссия матбуот котиби Одилжон Тожиев канал ёпилишига қатъий қарши эканини айтди.
"Қисқа қилиб айтганда, халқимизга "Маданият ва маърифат" телеканали керак. Бу борадаги қарор лойиҳаси кенг жамоатчилик, зиёлилар томонидан танқидга учради.
Мен ҳам бир зиёли, ўзбек халқининг оддий бир вакили сифатида руҳониятимизни тўйинтириб турган телеканалнинг "ёпилиши"га қатъиян қаршиман.
Энг чатоқ томони, ҳар бир вазирликка битта телеканал, деган тамойилни ўйлаб топманглар, барака топгурлар", - дейди у.
