Солиқ қўмитаси матбуот хизмати хабарига кўра, давлат томонидан аҳолининг ижтимоий ҳимояга муҳтож қатламини қўллаб-қувватлаш учун шарт-шароитлар яратилмоқда. Ана шундай тадбирлардан бири, 2023 йил 1 майдан жорий этилган “Ижтимоий ҳимоя ягона реэстри”га киритилган жисмоний шахсларга айрим товарларни сотиб олганда тўланган ҚҚСни (12%) ижтимоий кешбэк сифатида қайтариш тизими ҳисобланади.
“Ижтимоий ҳимоя ягона реэстри”га кам таъминланган деб эътироф этилган оилалар киритилади.
Ўтган 4 кун давомида мазкур тизим фойдаланувчилари сони 4 534 нафарга етди.
Бироқ, бундай кешбэкка эга бўлиш ҳуқуқини суиистеъмол қилиш ҳолатлари учрамоқда. Масалан, фуқаро T.Ш. ҚҚСни қайтариш мақсадида харид суммаси 650 млн сўмлик, фуқаро M.A. 481 млн сўмлик чекни "Солиқ" мобил иловасида рўйхатдан ўтказган. Бу эса кам таъминланган аҳолига ижтимоий кешбэк бериш моҳиятига зиддир.
"Шу муносабат билан фуқаролардан "Солиқ" иловасидаги аккаунтига учинчи шахсларга кириш ҳуқуқини бермасликларини ҳамда шубҳали чекларни рўйхатдан ўтказишларига йўл қўймасликларини сўраймиз.
Чунки бундай ҳаракатлар маълумотларни қўшимча органиб, текширувлар ўтказиш заруриятини келтириб чиқаради. Бу эса ҳақиқатда ижтимоий қўллаб-қувватлашга муҳтож бўлган фуқароларга кешбэк тўлаш муддатини кечикишига олиб келади", - дейилади хабарда.
