“Реал Мадрид” ҳимоячиси Дани Карвахаль мавсум якунида клубни эркин агент сифатида тарк этиши ва фаолиятини Италия Серия Ада давом эттириши мумкин. Унга “Интер” клуби энг жиддий қизиқиш билдирмоқда.
Италиянинг “Интер” жамоаси “Реал Мадрид” билан шартномаси якунланиш арафасида турган 34 ёшли испаниялик ҳимоячи Дани Карвахални ўз сафига қўшиб олишни режалаштирмоқда. Бу ҳақда “Fichajes” нашри хабар берди.
Манбага кўра, миланликлар тажрибали футболчини эркин агент сифатида олиш имкониятини кўриб чиқмоқда. Клуб бош мураббийи Кристиан Киву Карвахалнинг етакчилик фазилатлари ва муҳим ўйинлардаги барқарор ўйинини юқори баҳоламоқда.
Шунингдек, “Интер” қанот ҳимоячиси Дензел Дамфрис жамоани тарк этиши мумкинлиги боис, ушбу позицияни кучайтиришни устувор вазифа сифатида белгилаган.
Карвахалга шунингдек “Ювентус”, “Комо” ва “Милан” каби клублар ҳам қизиқиш билдирмоқда, бироқ ҳозирча асосий даъвогар сифатида “Интер” кўрсатилмоқда.
Маълумот учун, Дани Карвахаль “Реал Мадрид” академияси тарбияланувчиси бўлиб, клуб сафида 20 йилдан ортиқ фаолият юритган. У мадридликлар билан 27 та соврин қўлга киритган, жумладан, 6 марта Чемпионлар лигаси ғолиби бўлган.
