Facebook ижтимоий тармоғида Жиззах вилоятида чала қурилган уй-жойлар фуқароларга сотилгани ҳақида хабар берилди. Ҳолат бўйича Қурилиш вазирлиги расмий муносабат билан чиқди.
Унда айтилишича, ҳолат Жиззах вилояти қурилиш соҳасида ҳудудий назорат инспекцияси томонидан ўрганилди. Маълум бўлишича, Жиззах шаҳри Алишер Навоий кўчасидаги кўп қаватли 28/А-сонли турар-жой обекти инспекциядан 2017 йил 23 августда рухсатнома орқали рўйхатдан ўтган.
Обект 3 та блокдан иборат бўлиб, ҳозирги кунда 1-блок 1-йўлакнинг дастлабки қаватидаги савдо дўконлари тўлиқ якунланмаган, юқори қаватлардаги турар-жой қисмида қурилиш ишлари тугатилган. Ҳудди шу ҳолатни икки йўлакли 2-блокда ҳам кўриш мумкин.
Мазкур қурилиш обектида инспекция томонидан қонунчиликда белгиланган тартибда назорат ишлари олиб борилган. Лойиҳа ҳужжатларига ҳамда шаҳарсозлик нормалари ва қоидаларига мувофиқлиги юзасидан тегишли ишлар амалга оширилган. Назорат давомида инспекция томонидан шаҳарсозлик ҳужжатларида белгиланган тартибда аниқланган камчиликларни бартараф қилиш юзасидан тегишли таъсир чоралари ҳам қўлланилган.
“Сангзор дизайн қурилиш” МЧЖ томонидан қурилаётган 28А-сонли турар-жой биносида қурилиш-монтаж ишлари тўлиқ якунланмасдан хонадонлар фуқароларга сотилган. Бугунги кунда 1- блок ҳамда 2- блокларда фуқаролар ўзбошимчалик билан кўчиб келган ва яшаб келмоқда. Аммо “Сангзор Дизайн қурилиш” МЧЖ томонидан бинони фойдаланишга қабул қилиш юзасидан ваколатли органга ариза юборилмаган.
Ўзбекистон Республикаси Шаҳарсозлик Кодексининг 32-моддаси 10-бандида “Қурилган обектдан қурилиши тугалланган обектни топшириш-қабул қилиш тўғрисидаги тасдиқланган далолатномасиз ва ҳудудий инспекциянинг қурилиши тугалланган обектдан фойдаланиш учун рухсатномасисиз фойдаланишга йўл қўйилмайди, - деб белгиланган.
Шу боис ҳолат юзасидан инспекция томонидан Ўзбекистон Республикаси Маъмурий жавобгарлик тўғрисидаги Кодекснинг 99-моддаси 5-6-қисмлари билан фойдаланишга қабул қилиш қоидаларини бузиш бўйича буюртмачи ташкилот раҳбари О.М.Зайниддиновга нисбатан маъмурий ҳуқуқбузарлик тўғрисида баённома расмийлаштирилди. Белгиланган тартибда маъмурий таъсир чораси қўлланилган ҳамда ҳудудий инспекция томонидан қонун бузилиши ҳолатини олдини олиш учун маҳаллий ҳокимият ва прокуратура органларига тақдимномалар киритилган.
