Ўзбекистонга Испаниядан Talgo компаниясининг 4 та тезюрар “Афросиёб” электропоезди келтирилади, деб хабар бермоқда “Дунё” АА.
Қайд этилишича, Ўзбекистон элчиси Жаҳонгир Ғаниев Испаниянинг Patentes Talgo компанияси президенти Карлос Паласио Ориол билан учрашди. Учрашувда Испания томони Ўзбекистон билан темир йўл транспорти соҳасида кўп йиллик ҳамкорликни давом эттириш ҳамда мавжуд олтита Talgo-250 поездига қўшимча равишда яна тўртта Афросиёб тезюрар поездларини етказиб беришдан ўта манфаатдор эканини маълум қилди.
Patentes Talgo президенти Дания ва Германия учун 64 та поезд ишлаб чиқаришда катта буюртма бўйича ишлар олиб борилаётгани сабабли иш юки юқори бўлишига қарамай, компания “Ўзбекистон темир йўллари” учун тўртта Афросиёб электропоездини Ўзбекистон томонидан режалаштирилган муддатларда ишлаб чиқариш ва етказиб беришни таъминлашга тайёрлигини алоҳида таъкидлаган.
Буюртмани Испания ҳукумати ҳузуридаги Испания компанияларини халқаролаштириш жамғармаси (FIEМ)дан узоқ муддатли имтиёзли кредитларни жалб қилган ҳолда молиялаштириш учун режалаштирилган.
