Қайд этилишича, Франциянинг Канн шаҳрида ўтказилган инклюзив фильмлар халқаро фестивалида “Қадам. Қуёш боласи Юсуф” қисқа метражли фильми катта муваффақиятга эришиб, бош соврин — Гран-прини қўлга киритган.
Ёш ижодкорлар ўзининг ёрқин истеъдоди, юксак профессионал маҳорати ва изланувчанлиги билан мамлакатда кино санъатини ривожлантириш, халқнинг бадиий-эстетик ва маънавий салоҳиятини юксалтиришга муносиб ҳисса қўшаётгани алоҳида таъкидланган.
Шунингдек, миллий қадриятларни акс эттирувчи бадиий образларни яратиш, ёшлар қалбида Ватанга муҳаббат ва садоқат туйғуларини мустаҳкамлаш борасидаги хизматлари учун қуйидагилар “Келажак бунёдкори” медали билан мукофотланди:
— Қодиров Суҳроб Толмасович — эркин ижодкор, сценарист ва кинорежиссёр;
— Усмонов Дилшодбек Холмурод ўғли — С.А. Герасимов номидаги Бутунроссия давлат кинематография институтининг Тошкент шаҳридаги филиали талабаси, кинорежиссёр.
