Республикада электр энергиясини беришда чекловлар бекор қилинганидан кейин 4 кун ўтиб қайтадан жорий этилди.
Энергетика вазирлиги Ахборот хизмати хабарига кўра, кеча, 12 март куни кучли ёмғир ва қаттиқ шамол туфайли электр қурилмаларида юзага келган 12 та, газ таъминотида юзага келган 3 та носозлик бартараф қилинган.
Кеча кун давомида Фарғона вилоятидаги 110 кВли “Л-Арсиф”, 110 кВли “Л-Чархий-1” электр узатиш тармоғида носозлик кузатилган. Оқибатда Ёзёвон, Тошлоқ ва Қўқон шаҳридаги 8,5 минг истеъмолчи ҳамда кичик ишлаб чиқариш саноат корхоналари электр таъминотидан узилган. Соат 22 дан 7 дақиқа ўтганида истеъмолчиларнинг электр таъминоти тўлиқ тикланди.
Тошкент шаҳрида 110/35/10 кВли “Тепличная” подстанцияси 15 МВт қувват билан кучланишсиз қолган. Оқибатда Миробод ва Сергели туманларидаги 3 минг 700 та истеъмолчи электр таъминотидан узилган. Соат тунги 12 дан 22 дақиқа ўтганида истеъмолчиларнинг электр таъминоти қайта тикланди.
Бугун соат 8 дан 5 дақиқа ўтганида Фарғона вилоятида кучли ёмғир ва шамол туфайли 6-10 кВли 11 та электр узатиш тармоғида носозлик юзага келган. Оқибатда Бешариқ, Данғара ҳамда Ўзбекистон туманларидаги 7 минг 500 та истеъмолчи ва кичик ишлаб чиқариш саноат корхоналари электр таъминотидан узилган.
Эслатиб ўтамиз, 8 мартдан электр энергияси етказиб беришда ҳеч қандай чекловлар қўлланилмаслиги ҳақида хабар берилганди.
